Rabu, 14 Maret 2012

meurumpok istri

salam alaikum po bungong giri
saleum bang ardi keu rakan dumna
nabacut pantoen lon susoen rawi
dari bang ardi keurakan dumna

kon lon jak tandeng menang ngon seri
tapi bang ardi keugura-gura
kadang bak jak-jak meurumpok istri
katrep bang dirman eli meulajang tuha



umu kalanjut goh jeut keu suami
dara yang tari kaheuk geumita
mulai di gampong katrok u pasi mali
jinoe bang eli di samatiga

ngon sidroe dara meu ikat janji
nyak putik giri Rosita Ita nama
karab sibuleun bak sang lon hi
bang dirman eli cukop gembira

tapi that sayang rindu lam hati
di kanda eli meurumpok hana
bak sebab jarak ngon putik giri
nyak dara tari di singapura

bulei that lagak ticeum meurpati
bak cabeung giri meu ayang senda
riyeuk geulombang bak bineuh pasi
cicem keudidi siujudo dua

meunyoe di rakan na iba hati
neumita istri keu dirman elia
adak han lagak beuk gura that hi
adak kon thon tinggi thon peutdua

nyoe lagei papa leupah serasi
cocok sekali ngon dek zahara
zahara manja ngon papatari
cukop that hi pineung plah dua

katreep meucinta dua insani
masa lam seni di aceh jaya
menurot data ardi selidiki
maulod akhi rencana pesta

ureung nyan dua karap khanduri
aneuk merpati kana lam cintra
kru seumangat………………

meumada dilee ca-e bang ardi
bah singoh hari laen tarika
malam kajula terasa leupi
maklum bang ardi dek e ureung katuha

gaseuh ngon rindu


laot lhok rigaih riyeuk meu alon
jalo ji euk tron meupuseung gisa
meubuleun-buleun megantoe ngon thon
dek putik sukon jinoe pat gata

lon padang buleun cahya meuble-ble
indah bukon lee buleun purnama
treup ka lon peutheun rindu lam hate
peukeuh euk sampee ureung lon cinta

pantoen lon tuleuh keu ubat hate
beuk sampee reule cinta keu kanda
lhei thon leubeuh cinta ta ukee
rindu lam hatee keu ureung yang lon cinta

ureung lon gaseuh serta lon sayang
bagah tariwang sawee kakanda
cinta geutanyoe han mungken leukang
ibarat labang dek e bak bapeun dama






Senin, 12 Maret 2012

Dirman Elia // Bungong Lam oen


dua blah beuleun geukheun sithon
sereutouh thon geukheun si abat
assalamua'laikom haba lon puphon
keurakan panton yang ka meusapat

yang na di kuta atawa di duson
bak layee panton mandum meusapat
meuheut lam hate ulon meususon
rindu that ulon neuk duk meusapat

ie krung tangse ilee u geumpang
nasaboh simpang u aceh jaya
nibak uroenyoe bang dirman datang
keuneuk keumarang bak layee kaca

peuizin ulon e rakan panton 
haba lon suson keu adek roslina
kamoe meuturi bak peukan lhok sukon
watei nyan di lon supe bus 262

adek roslina bungong lam-oen
leubeuh dua thon meujalin cinta
tetapi jinoe e rakan panton
nyan putik sukon hana meuhoka

karata gampong karata peukan
di ulon tuan meuputa-puta
tapi roslina han leumah badan
hingga lon tuan ka abeuh cara

menyona ide bak rakan-rakan
keu elia dirman neupeugah sigra
peukeuh bak dukon atawa kiban
seubab bang dirman han kutuho mita

Dirman Elia // Cinta Siedarah


lon lakei meuah e elia dirman
salah lon tuan bak puphom haba
beutoi that narit di adoe badan
kalheuh tunangan yoh saboh masa
 
tetapi jameun masa saboh jan
gata tunangan karna terpaksa
meunurot dali haba masanyan
bukon mak tuan yang han tung gata
 
 
hanjeut keuseubab e adoe badan
hana sipadan ngon dara roslina
yang leubeh saket e elia dirman
dek putik mancang mantong syedara
 
karna paksaan nibak saboh jan
geuyu tunangan gata bandua
beuk sampe dara luruh bak jalan
but elia dirman kayeum geu ba-ba 
 
walaupun cinta mantong lambadan
tapi that sayang dara han meuhoka
peugah alasan diwou u sabang
uroe mak meugang beusajan poma

Dirman Elia // Pemuda Dusoen


ampon geumilang hai rakan panton 
teukheum that ulon watei kubaca
ELIA DIRMAN pemuda duson
ngon dek HAYATON ka putoh cinta

az’jir  bantu didalam panton
pakat jak dukong DIRMAN ELIA
bacut lon tuleuh didalam panton
dua rakan lon galak keu dek ZAHARA

lakei kenalan bak baet panton
peugah that rihon rupa ZAHARA
ulon peuingat hai pemuda duson
beuk grop-grop lambong eunteuk ceulaka

ZAHARA mameuh adek di ulon
cit saboh gampong di aceh jaya
hanpeu kagalak hai pemuda duson
kusipak bak punggong gata ban dua

deungo beupah bacut lon suson
dek HAYATON ka gop po jeumba
    hana peu susah atawa rihon
    seubab dek HAYATON lakou jih kana

         
meubeuk kapeugah didalam panton
    gumboung pruet HAYATON but arjuna
    katanyong mantong nibak rakan lon
    ngon HAYATON sou na ikat cinta

     masa saboh jan bak rawon-rawon
     teuka rakan lon geu ujoe raba
     bak salah cukeuh teu-ot HAYATON
jaroe rakan lon meucupeut ngon pha  
ha..ha..ha..ha…

Selasa, 06 Maret 2012

saleum keu Dirman Elia



assalamualaikom elia dirman 
pakiban keadaan jinoe digata
peukeuh sehat atawa saket badan
peu jeut keumarang dengon bang juna

meunyona watei e rakan dirman
acie keumarang geutanyoe dua
neupuduk beupah baet lam panton
mangat jeut muphon watee gob baca

awai bacut bang juna puphon
tuleh lam panton tikoh lampaya
saboh riwayat jinoe lon suson
alah rakan lon keu gura-gura

bak si-on kertah narit lon peutroh
di nanggro jioh keu saboh bangsa
jiduek lam uruk ji eh dalam broh
Keu bangsa tikoh bang juna rika

tikoh dalam blang atawa di lampoh
wajeb taparoh bek jeut keubala
takoh dengon trieng tapageu lampoh
taleet beu jioh bek lee ji teuka

dilee kon udep di bangsa tikoh
kayem jipiyoh lam uruek raya
meu aneuk binoe sinan dalam broh
tikoh seumajoh peu-peu yang hawa

tetapi jinoe dibangsa tikoh
kadijak pajoh peu yang tapula
tapula ubi golom troh tanggoh
kalheuh dijak kueh peureudei jiba

pade tatabu keu bu ta pajoh
troh bangsa tikoh ka jijak seuba
leumpah sengsara menyoe na tikoh
habeh ji sampoh jagong tongkol dua

harkat ta udep sabe hana troh
tabiat tikoh lagei nyan rupa
jino hai dirman jipeugah katroh
rame dum tikoh dalam istana

dicok hareukat bak luwah lampoh
tabiat tikoh di ateuh meja
mahir komputer dibangsa tikoh
euk dipereuloh dum APBK

peung aneuk yatim katiteum pajoh
nyan keuh but tikoh dalam istana
peugah yang betoi pubut yang roh
dum akai tikoh bak manusia

meumada dilee watei karab troh
keu bangsa tikoh singoh lon sambong teuma 
wassalamu alaikom warahmatullah 
ka abeuh kisah nibak bang juna

Papatari Bundacinta Scmt //kana sou geusuek


     di teuka ujeun dimusu cangguek
     sideh diyup bruek cangguek meudoda
     rawi lon puphon saleum lon peuduk
pasou lam aweuk bagi beusigra 

ateuh bak mamplam umpung beurujuk 
meunyoe umpung leuk ateuh bak pala
di aneuk muda abeuh dum gabuk
pikee keu ibu beuk na yang janda


malam kasuboh manok di ku-uek
beudoh jak rukuk pujoe rabbana
meunyoe yang dara laen lom sibuk
geubuka fesbuk mita yang duda

didalam gampong kameung kap cituek
kateuka cakeuk dikheum meubura
dipapatari hana lee gabuk
kana sou geusuk oeh ujeun teuka

pante lhok bubon laot meuriyeuk
buweuh meusipreuk bak ming kuala
takalon dirman ibarat cakeuk
oeh teuka sijuek jaroe lam lungkeuk pha
hahahahaha......

didalam paya timoh bak abeuk
takoh taseupreuk keu eumpeun nila
pantoen malamnyoe nabacut paneuk
    seurang lon duk-duk bak karang haba