peusan keu adoe....

salam alaikom rakan sinaroe
rap beungoh uroe teungeut loen hana
kadari beuklam uloen duk sidroe
teuingat keu adoe Dirman Elia

adak mantong na poma lam nanggroe
uloen ngoen adoe hudep bahgia
han mungkeun gata e dek udep lam rantoe
sebab poma droe tanyoe geumanja

 

kaheuk uloen klik sampee kaparoe
ingat keu adoe mantong sikula
beurayeuk saba Dirman adoe droe
kanda lamnanggroe mita beulanja

nyoe keuh cobaan wahee e adoe
poma geutanyoe meninggai donya
adakna syedara hana geuhiroe
han geuteum pakoe meusiblah mata

do'a talakei bak tuhan sidroe
poma geutanyoe beu ampon desya
beusehat badan tanyoe lam nanggroe
malam ngon uroe pujoe rabbana

oeh-noe keuh peusan dari kanda droe
moga geutanyoe troeh ban cita-cita
beuk susah hatee wahee adoe droe
bah pih tiep uroe udeup lam duka

loen mita nafkah keu gata adoe
kasaban uroe uloen keureja
demi kegata e putik panjoe
rela uloennyoe jak meukat sira

rindu keu sidroe putroe

alaikomsalam dirman meutuah 

jaroe dua blah loen bot keu gata 

haba takirem cukop that pah

gata meukisah keu sidroe dara

neu mita judo bek that yg ceudah
asai beu leupah lam buet agama
Jino loen suson dirman meutuwah
keuno meu langkah gabong cerita

adak han neu tueng haba sipatah
uloen ikelah anggab syehdara
kapai jeumerang lam laot luwah
asai phon langkah dari dermaga

gata hai dirman beuk apoh-apah
jinoe tapeuglah hajat meucinta
gata beurajin adoe meutuah
bungong yang cedah kagata jeumba

ka uloen simpan dara yang ceudah
bungong yang indah di aceh jaya

lagak that rupa ban buleun peut blah

aneuk wa limah di pasi geulima

Bineh gle tuhan hayeu sileumpah
naleung jih ceudah hana bandeng sa
kajeut keuh dilei haba lon balah
adak hana pah beuk neujak peukra